2019.3.4 • 周一
導讀：為了令工作稱心順利，很多人都會做出某種行為或儀式，例如擺風水陣。有人覺得這樣做能讓自己安心，有人則覺得這是迷信的行為。正所謂「信則有，不信則無」，今期《哈囉好工週刊》會分享打工仔的迷信行為。如果你都有「迷信寶典」，歡迎投稿至info@mss-recruitment.com和大家分享。
行運超人
行業：娛樂博彩
性別：男性
職位：基層職員
年齡：25 – 34歲
之前個老闆好信風水命理，仲要特登搵風水佬過嚟office睇風水，又喺佢間房放啲富貴竹同啲黃水晶。聽個風水佬話富貴竹對事業好，黃水晶係招財寶石，仲要放兩隻貔貅喺房對著房門，話貔貅吸財。而且老闆會嚴格按照黃曆上面的吉凶去做嘢，有時佢會突然唔出現，然後就叫人送文件去佢屋企簽，因為個日黃曆不宜出行，然後佢就連門都唔出，搞到班同事好無奈。
如果係人哋嘅，唔影響其他人都冇所謂啦。但係自己就唔會堅持迷信，就好似黃曆咁，如果樣樣都按照黃曆做人，咁好多嘢都做唔到，太不切實際。
之前喺台灣做嘢嗰陣，啲人習慣放包台灣零食「乖乖」喺部機器度，保佑機器可以正常運作。咁一開始我都唔信嘅，見自己餓餓哋，咁我就食咗包零食啦，然後唔知道點解咁啱得咁橋，部機器就死咗機，我以為只係運作過熱，自動斷線。但之後點都開唔返，直到我再買返包「乖乖」放返部機度，先可以開返。
靈，因為部機開唔到，買包零食放上面就開到。唔到你質疑，唔到你唔信！
會，因為有時真係好邪，寧可信其有啊！
職安真漢子
行業：建築及工程
性別：男性
職位：基層職員
年齡：25 – 34歲
無論乜嘢大小工程，其實好多人都會揀一個好日子，拜好神再開始動土。但係我上一手經理就話自己係無神論者，唔得閒因為呢啲問題而嘥咗個動工時間，唔會無聊信埋呢啲嘢，直接同客人講一個最快嘅日子，神都冇拜就開始動工。點知就係動工期間有好多員工都受咗傷，其他員工好多都埋怨話因為冇拜神先咁多人出事，因為以前佢哋每次拜神都冇試過咁多人受傷。
靈，舉頭三尺有神靈，動土前係需要拜拜，都係為咗事事順利啫。
會吧，我哋行業其實只係有少數人會唔跟，其實感覺唔拜會唔安心。
食物鏈底層
行業：奢侈品零售
性別：女性
職位：基層職員
年齡：25 – 34歲
我哋店舖經理定咗一個好搞笑嘅規矩，佢嚴格要求我哋清潔店鋪嘅時候，掃地一定要要向內掃，一定唔可以向街掃。佢話如果向街掃會掃走晒哋財氣，向店鋪內掃會招財。而且經理每隔幾日，就會買啲青色嘅蕉（唔係用嚟食果隻，時間可以擺耐啲）係店鋪某個位。佢話嗰個位置係財位，喺財位放青色嘅蕉可以招財。
我覺得好過冇，雖然鋪頭唔係因為咁而特別多人，但係呢啲舉動可能幫我哋擋左唔少劫。
會，穩外力幫助吓都冇壞。 
貓星人
行業：批發及零售
性別：女性
職位：基層職員
年齡：18 – 24歲
我哋鋪頭嘅收銀處由舊年開始放咗一座招財貓，老細希望佢可以幫我哋公司招財，令到財運滾滾來。佢仲有喺收銀機底放封利是，話可以聚財喎！自從做咗呢啲風水嘢之後，唔知係咪心理作用，覺得今年生意確實比之前好。有時鋪面比較少人嘅時候，我哋嘅店鋪經理就會攞十幾個銀仔，撒喺店鋪地下。真係唔到你唔信，10分鐘後，陸續好多人過嚟買嘢幫襯，又爆數！
真係唔到你唔信，次次爆數嘅殺手鐧！年尾花紅都係靠依樣咋！
諸葛亮
行業：地產
性別：男性
職位：基層職員
年齡：25 – 34歲
公司老闆識得一個神算，每次作出任何投資，都會問吓神算嘅意見，要唔要投資，要唔要買。而神算每次都會做一個指定動作：扔筊杯，話係詢問神靈意見。每次扔到聖杯就會話神靈同意，可以買；扔唔到聖杯就唔買，無論嗰個投資有幾好，望落去嗰個潛力有幾高，只要個神算話唔得，或者扔唔到聖杯就一定唔會買。
就咁睇都唔錯，最少老闆唔炒我哋，證明公司都唔缺錢，但其實錯過咗嗰啲賺唔賺錢我就唔知啦。
會，其實老闆都係求心安理得。唔係有啲咩大反效果就得啦。
今期我們分享了很多澳門打工仔的職場迷信。而且他們也得到不錯的結果。但我們都建議大家，凡事不要太沉迷，風水擺設可能使你運氣增加，但是如果太多或者太沉迷，定必帶來反後果。以下我們也會分享一些反效果的讀者故事。
鬚聞瘋
行業：資訊科技
職位：專業人士
性別：男性
年齡：25 – 34歲
公司有個女同事好信星座，咩都賴星座。佢會睇每月嘅星座運程，全部嘢都跟足啲星座運程嚟做，例如今日適宜穿黑色，咁佢就會著到全身黑咁返嚟。同埋只要嗰個月有嘢可以増強運氣，佢成個位都會係嗰樣嘢。佢令我最深刻嘅事就係之前佢同隔離部門男同事分手，佢怪責嘅原因都係話星座唔夾，導致佢唔夠安全感，又話咩水星逆行嗰陣特別嚴重。救命……
如果我同佢係朋友我會勸佢唔好。一個人其實應該信自己，吓吓都用星座嚟做標準，會搞到個人個價值觀都錯晒。
小燕子
行業：批發及零售
性別：女性
職位：基層職員
年齡：25 – 34歲
公司老闆好迷信㗎，我絕對覺得佢信風水佬講嘅嘢多過佢嘅父母。只要過一段時間，佢都會請啲風水佬過嚟睇公司。有次好好笑，個風水佬行到去我哋前台，突然間瀨尿。話公司有好大邪氣，佢同老闆解釋完啲風水嘢之後，老闆嗰個樣真係笑死我，大概應該就同公司破產冇分別。就因為呢啲風水師嘅說話，我喺度做咗五年，公司已經搬咗三次地址。
唔靈，公司又冇多咗生意，員工就走咁一堆。人工加完等於冇加，公司投放最多嘅資源就係搬地址。
唔會囉，因為迷信都只係心理作用，長期員工流失就係佢最好嘅證明。
其實適當的迷信，絕對不是一件壞事。花小小心思，換來多一點的幸運，何樂而不為？我們為大家收集了不同的方法，以下我們將會為大家提供一些辦公室最常見的風水建議：
風水學來說，凌亂的枱面比較難以聚氣，氣不聚，運也難起。同時老闆也會認為你缺乏條理，財運也難起。提提你電腦的桌面也是包括在內的！
若有枱燈，建議擺放在枱面的左手邊。首先不會阻礙到慣用手工作，而且也做到風水學所說的「龍明虎暗」，營造一個氣場光明、落落大方的佈局。
風水有「左青龍，右白虎」的說法。文件左高右低的擺法，可營造出龍高虎低的佈局，這是創造能力強的象徵，同時也代表着財水往低處流進來，運勢也會比較好。
建議放在枱面右邊或收在櫃內。放在枱面的話，最好讓筆筒的文具維持在一樣的高度，減少心神不寧。剪刀、美工刀等鋒利的文具盡量放到櫃內，否則會弄斷好的運勢。
擺放綠色植物可以有效提高人緣運。切記不可放仙人掌等多肉植物，以免招惹是非！留意假花或枯萎的植物會有反效果！
結語
雖然過度迷信是不理智，但以上種種故事都是因為打工仔想事業順利而做出的舉動。當然，除了這些迷信行為，更重要的是時刻裝備自己。那麼，當機會來臨時你便可發揮己長。
Back 