新聞內容 
《小人物大故事》我為自己而自豪︱3月18號哈囉好工週刊火熱登場
- 2019-03-18
- https://mp.weixin.qq.com/s/69tY6a_KiXGQI7ZmoyRisw
2019.3.18 • 周一
導讀：剛畢業的職場新人、低級職員、或剛入職的員工，有很多人都會把這幾類打工仔視作「小人物」。這些「小人物」經常被人標籤：沒有能力、辦事效率差、做事欠缺細心。但其實有很多「小人物」都有無窮的潛力，他們的能力甚至比自己的上級還要利害，只是其他人沒有細心留意他們，今期「哈囉好工周刊」為大家分享「小人物」不可忽略的一面，讓你們刮目相看！
化名：嚇我唔到嘅
行業：交通運輸
性別：男性
職位：基層職員
年齡：25 – 34歲
我哋做物流嘅，最近嚟咗個新仔。可能佢係第一次入呢行，公司平時要我哋準時將某批貨送到某個地址。佢應該怕畀人話，所以都會提前做好準備，上網查定搵定邊條路會冇咁塞，做足兩手準備，然後再同我哋提出建議方法。但係我哋跟車同事竟然話佢唔好嘥時間做咁多嘢，佢話自己好熟澳門啲路，問佢搞咁多嘢做咩。然後好死唔死咁啱司機行開嗰條路出咗車禍，搞到大塞車，而我哋部車就塞咗喺中間，唔上唔落。咁當然最後啲貨送遲咗，啲客打過嚟公司投訴。老闆之後問返司機點解會咁，了解咗之後就話咗跟車同事一獲，自己平時懶仲想教壞啲好嘅新同事。
化名：傻的嗎
行業：專業人員
性別：男性
職位：基層職員
年齡：25 – 34歲
老闆要求我哋每日要做實驗同Check數據。兩個月前咁啱有個新人入嚟，佢好快就同我哋熟咗。佢同我哋其中一個熟手特別熟，咁佢個「好前輩」教佢啲嘢求其做就得，話老闆唔會每日都檢查數據，佢最多只會係檢查月尾嗰幾日嘅數據。但係新同事係工作上面好認真，就算同我哋幾熟，佢一開工就變咗第二個人，每日都好認真咁樣檢查。有一日老闆話要睇返上個月嘅數據，然後睇完就問「好前輩」佢點解成個月嘅數據都係一樣，因為正常啲數據點都會有啲浮動，查完閉路電視先知佢原來每日都係寫同一個數據。好彩新同事做事認真冇按照「好前輩」嘅話去做，唔係佢份花紅肯定都凍過水。
化名：OT黃
行業：銀行和金融
性別：男性
職位：中層管理者
年齡：25 – 34歲
宜家呢個年頭冇乜人鍾意帶新人，因為有時教佢哋嘅精力仲多過自己本身啲工作量，而且有啲新人態度都非常唔好，你好用心教佢哋，佢哋就左耳入右耳出。但公司有個Fresh grad靚妹，雖然就叫佢靚妹，但佢嘅能力就一啲都唔靚。首先佢做嘢比其他老員工快。咁呢個可能係資質問題，但係大家最欣賞佢嘅就係佢肯接受批評。我哋公司啲老員工，如果你話佢，佢一係就卸膊，一係就惡番轉頭。但係呢個靚妹，佢做錯嘢係會主動承認，而且佢係會用腦諗解決辦法，唔係喺度埋怨嘈怨巴閉嗰啲人。其實我哋都唔應該用階級嚟評論一個人的實力同工作心態，就算係新人都有好多值得學習嘅地方！
0
化名：雷曼兄弟
行業：地產
性別：男性
職位：中層管理者
年齡：35 – 44歲
雖然好多人都覺得新人乜都唔識，乜都要教一餐，但其實出咗嚟做10幾年嘅我覺得佢哋比起某啲「老屎忽」更加好。公司上年推出新項目，需要人手企喺街度派傳單。但人手實在有限，而且臨時請嘅幾個part time no show，所以公司要全office嘅同事都要出去企街幫手派傳單。收到消息後，好多「老屎忽」怨聲載道，係度鬧公司，發洩不滿，話好冇面，要拋頭露面。咁我覺得佢哋唔積極幫手派傳單都算啦，派咗半個鐘仲走咗去飲茶。相反幾個資歷淺嘅新同事冇架子冇怨言，好積極咁派傳單，連「老屎忽」嗰份都幫手派埋，我都算係「老屎忽」都要稱讚佢哋，我自己都因為呢件事要向新人學習！
化名：睇唔到Maroon 5！
行業：會議展覽
性別：女性
職位：中層管理者
年齡：35 – 44歲
我做咗呢行都有10年，其實都遇過好多新人，但只可以講一句一代不如一代。好多都超級懶散，但仲要要求多多！能力同埋職業操守都嚴重唔達標！但最近有兩個新人完全令到我跌眼鏡！聽佢哋講呢份先係佢哋第一份職業，但呢一對孖仔一入嚟第一日已經背好晒啲嘢，問佢哋啲問題都全部答到，諗住以往啲新人都係隨便咁睇吓，甚至公司啲老職員都係記得大概，有時都會犯錯，但係呢對孖仔到而家入咗職半年，我甚至專登想捉佢哋錯處都捉唔到。（笑）學嘢快，記性好！直到上個星期我將我嗰兩位老職員左右手換咗做佢哋！佢哋完全可以成為榜樣！
化名：我覺得自己係零
行業：娛樂博彩
性別：女性
職位：中層管理者
年齡：25 – 34歲
我哋係分析部門，咁公司最近嚟咗個超級新人，其實佢只係admin，但係就幫我哋條Team帶嚟咗唔少嘅改善。公司條Team開咗到而家，都係一成不變。所以有啲嘢會好唔update，或者用緊嘅方法係冇效率嘅。但呢位新人就好細心留意我哋部門平時嘅日常運作，當佢諗到有啲咩好嘅建議，佢就會馬上同我哋講。佢係細心到我哋上司有幾次帶埋佢去同總監開會，畀佢發表意見，隔離部門同事見到都覺得好誇張。
化名：心淡的上司
行業：銀行和金融
性別：女性
職位：中層管理者
年齡：35 – 44歲
有個新入職嘅員工，明明之前冇做過呢行，但佢做事特別有條理，基本上我要嘅資料佢都可以好快畀到。但係佢個啊頭就啱啱好相反，所有嘢基本上都係拖字訣，咩都要最後一日先交，好多時仲過埋限期先交到畀我。我以為佢好多嘢要做啦，但我觀察完發現佢其實有一半時間都係玩IG。高級職員嘅工作態度同效率居然不如新入職嘅低級職員。如果佢啊頭仲係咁，我相信新入職嗰位員工好快可以同佢平起平坐！
化名：777
行業：批發及零售
性別：女性
職位：基層職員
年齡：35 – 44歲
我係做7仔嘅，我哋份工成日都會遇到啲無理取鬧嘅客人：有啲鬧你鋪頭啲嘢貴過其他超市、有啲一日走入嚟幾次問有冇免費印花、有啲甚至自己買完支牛奶冇飲，等到過咗期行返嚟嘈要換，一般呢啲店長一出馬就會搞掂。有一次我同個啱啱畢業嘅新仔同店長一齊開工，有個客人入到嚟唔小心撞跌咗個架，搞到有幾樣嘢爛咗。我睇得出個客人真係唔小心嘅，但係店長一出嚟就好似當佢係偷嘢咁，一直鬧佢，搞到個女仔最後忍唔住喊咗出嚟。新仔見到個情況咁，好溫柔咁畀張紙巾個女仔，扶起返個架，同佢解釋返有邊啲嘢要畀返錢，安慰佢一吓就搞掂咗件事。我覺得個新仔好優秀，但店長只顧店舖利益。其實件事根本唔大，但係店長連呢啲技巧都唔識，好彩個新仔超級掂！
化名：我個姓好特別
行業：批發及零售
性別：女性
職位：基層職員
年齡：25 – 34歲
之前公司入嚟嗰堆新人都係一啲奇珍異獸。完全唔知佢哋個腦諗乜，實力再勁都預測唔到佢哋想做乜，成日都做一啲完全估唔到嘅錯誤出嚟。本身咁樣都算，最慘就係老細好鍾意成間公司啲人一齊開會，話希望大家可以搵到新思維去推廣啲產品。其實呢個方向係好，但因為當你每個月都開一次會，根本就諗唔到有咩新方法，而且做得越耐就越容易畀以往嘅推廣方式框住。就喺上個月，啱啱有個新人妹妹仔入咗嚟，本身大家都好驚佢又係啲奇珍異獸，點知佢提出咗兩個我都覺得好好嘅意見，公司上個月嘅業績當堂好咗，大家都覺得呢個新人超級勁，依家仲幫佢起咗一個花名叫「救世主」，今個月開會啲靈感都靠晒佢！
作為打工仔的你們，有沒有一種覺得自己拼勁了很久，但仍是公司裏面的「小人物」，升職永遠無望？如果你有這種感覺，請好好看我們以下的分享，看看自己有沒有犯過以下的錯誤：
和同事玩得太熟絡
很多老闆都會在下屬中尋找左右手，然而很多下屬之間玩得太熟絡，經常講同事八卦，上司自然不放心把責任交給他。
際遇問題
升職除了按實力，與上司合不合拍也是一個問題。有些上司比較自我中心，只顧自己在老闆面前的表現，如果你上司是這類人，想在這公司上位可以說是非常困難！
公司架構大小
若你的部門只有你一個人，你很難有機會晉升。千萬不要認為負責部門的全部事情，就很容易進入大公司。長期待在小部門讓你欠缺管理能力，難往高處攀爬。
不嘗試走出舒適圈
有一些打工仔只會顧好平常的日常工作，不會力求進步，以為自己在公司待久了，就有機會上位，這樣的惰性很容易被其他有能力的人取代。
缺乏管理能力
要向上爬，除了本身的工作做得妥善之外，切勿忘掉管理能力。不懂管理下屬，只會獨自工作，上司很難提攜你。
結語
看過讀者們的分享，你有對「小人物」放下不該有的刻板印象嗎？高年資固然經驗多，但不代表他們沒有東西能從「小人物」身上學習。如果你現在是「小人物」，現在就是你努力學習的時機，因為任何「大人物」都是從「小人物」演變出來的！
返回 