新聞內容 
《侏羅紀公園》最恐怖上司分享︱3月25號哈囉好工週刊火熱登場
- 2019-03-26
- https://mp.weixin.qq.com/s/LwhW_g0D3a5f3FR-d2sMag
2019.3.25 • 周一
化名：松田！
行業：娛樂博彩
職位：基層職員
性別：男性
年齡：25 – 34歲
我都唔知點形容呢位上司。我上司同我講，所有嘢都要比佢睇咗先可以送去其他部門，咁我咪將我整理好嘅文件送入佢房，點知佢就鬧我做咩拎份嘢入嚟，「你自己唔識睇完就送去其他部門咩，咁簡單嘅嘢都做唔好你讀屎片㗎？」然後我就同佢講係佢話要過目完先可以送嘅，點知佢又破口大罵話點解份文件有錯仲拎入嚟。我再睇返佢指嘅位置確定一吓，根本就冇錯！我問返佢我錯咗啲咩，佢竟然叫我返出去。遇着啲唔講道理嘅老細，我又可以點～
如果你是這位上司，你會如何處理同類事件？
無論心情幾差，我都會盡量自己搵方法發洩。亂咁向下屬開火，只會搞到公司士氣低落。
化名：放過我好嗎
行業：行政/辦公室助理
職位：基層職員
性別：女性
年齡：25 – 34歲
我前上司好鐘意放工之後繼續搵我傾公事，無論我做緊咩佢都要我即時覆佢，打電話要即刻接，WeChat又要即刻覆。咁有次我沖緊涼，上司又打電話揾我，當然miss咗佢嘅call啦，佢打咗好多次電話過嚟。我沖完涼見到已經覺得大事不妙，就即刻打返過去。點知我都未解釋頭先係因為沖涼先miss咗佢 call，佢就係咁鬧，不停鬧，好似鬧人嗰個一定係啱咁。最後，我真係覺得好大壓力就辭咗職，然後我同交接我嗰個同事講，你自求多福啦，完。
如果你是這位上司，你會如何處理同類事件？
將心比己，我唔會唔畀休息時間員工，冇人鍾意自己放工仲畀公事煩着。除非放工連瞓覺時間都係計錢，即係三倍人工，如果唔係就唔好搞人哋喇！
化名：送隻嘿美畀你
行業：行政/辦公室助理
職位：基層職員
性別：男性
年齡：35 – 44歲
我上司係唔洗經常返office嘅，可能一個星期先返嚟一次，但其實公司有咩Project都要佢指示我先可以去做嘅。問題就嚟啦，我上司經常性唔覆我Email同WeChat。同一日問佢三次都唔理我，就算第二日再搵佢都係咁。咁我 可以點，我只好按過往經驗做住先囉。到上司催我交貨嘅時候，就話我份嘢點解唔按照佢嘅要求做，又唔問咗佢先做，總之呢份嘢佢係唔會要嘅，叫我重新做過。唉，要重做都算，佢仲要限我一日內改好畀佢，我當場O咗嘴，我又硬食死貓啦！
如果你是這位上司，你會如何處理同類事件？
我會同下屬保持良好溝通，講清楚要按咩要求做。一句唔要就唔要，浪費資源！浪費時間！
化名：靚聲王請坐低
行業：銀行和金融
職位：基層職員
性別：男性
年齡：25 – 34歲
我上司好鐘意收集小道消息同八卦，仲好鍾意講人是非。佢一得閒就單獨叫一個同事入去佢房度「關心」吓同事，開頭就問吓你工作情況，第二句就開始講是非，基本個個同事都畀佢叫過入房。最誇張嘅係，佢齋聽就算啦，仲要搞風搞雨。特登問同事A，覺得同事B點，同事A話覺得同事B幾好啊。上司繼續問，你唔覺得同事B成日遲到早退咩？同事A就話覺得還好啦，又唔係成日。點知上司居然喺同事B面前話同事A向佢投訴成日遲到早退。搞到同事A和同事B關係好差。但其實明明上司先係八卦是非嘅「颶風中心」，大家明明本身冇嘢都要特登挑起事端。
如果你是這位上司，你會如何處理同類事件？
絕對唔會搬弄是非，大家一盤散沙咁，一旦合作質量同時間都會有問題，冇嘢搵嘢嚟做。
化名：腦容量1kb
行業：交通/運輸業
職位：中層管理者
性別：女性
年齡：35 – 44歲
我以前嘅老闆好鐘意五時花六時變，明明佢點頭話咗OK，但轉頭又話都係唔好啦。有次我WeChat問佢點覆個客，佢教我點覆之後，咁我就照佢意思覆。但點知佢轉頭就鬧我點解要咁覆個客，話我冇腦，唔應該咁覆，鬧足我成個鐘。我心諗，你碌返上去睇吓你自己打左啲咩嘢啦好嗎。但係為咗花紅，我都係選擇唔出聲。最後佢仲要補多一句：「你以後send前應該要問吓我，你咁做嘢好唔得。」我真係唔知點覆佢好，只可以講佢真係一個「好腦細」。
如果你是這位上司，你會如何處理同類事件？
我唔會五時花六時變囉，做事果斷啲，你一個決定足以影響下屬多日嘅工作量。
化名：唔關你事
行業：酒店營運
職位：基層職員
性別：女性
年齡：25 – 34歲
我上司好鍾意洗人腦，公事上畀你洗腦都算啦，但佢連私事都要洗我腦。話說，有日我臨放工嘅時候，上司突然畀堆嘢我做，話好急，咁我唯有即刻OT做完先走。但咁啱嗰日，我約咗我未來奶奶食飯，第一次見面，我自己好心急，我男友都好心急，我男友打電話催咗我幾次，大家語氣都有啲唔好，而呢件事唔知咩情況畀我上司聽到。第二日返工，上司叫我入房，開始同我洗腦，我以為又係嗰三篤屁，點知上司居然話：「你個男朋友咁樣係好有問題，咁冇耐性；你嘅未來奶奶都肯定脾氣唔好，日後好難相處，你要考慮清楚啊。」我即時O嘴，好想拍上司台，太過分！佢憑咩評論我私人事，仲好似同我好熟，好了解我男朋友同未來奶奶咁，仲勸我分手，想我成世只為公司奉獻！簡直恐怖過邪教！
如果你是這位上司，你會如何處理同類事件？
就算係大老細都唔可以侵犯人哋嘅私隱同唔尊重人。而且隨便評論人哋嘅私事，完全冇諗過人哋嘅感受，會令員工好受傷。
化名：語癌末期病患者
行業：廣告/傳媒
職位：基層職員
性別：男性
年齡：25 – 34歲
我覺得冇腦嘅上司其實先係最恐怖囉！作為Designer，交得設計稿畀上司就預咗有嘢要改。但佢次次睇咗兩眼就話唔得、太差、再改過。但係咩唔得，要改咩，就完全唔講。問佢需要改啲咩，佢就答你「我唔滿意」，真係吹佢唔脹！咁佢係上司我點都要做嘅，但改嚟改去佢都唔滿意，直到我拎返我嘅初稿入去，佢就話一早咁設計咪得囉，成日都浪費佢時間同我講要改咩⋯⋯(黑人問號？)
如果你是這位上司，你會如何處理同類事件？
指示明確係上司基本要有嘅條件。唔識解釋，而且意見太主觀，簡直係浪費地球資源。
化名：拜拜你條尾
行業：會議展覽
職位：基層職員
性別：女性
年齡：25 – 34歲
我個上司好鐘意連坐法，一人犯錯，集體受罰嘅刑罰制度。無論係邊個做錯咗都好，都會成條Team一齊入去佢辦公室畀佢噴。有次佢誤會咗係我哋部門做錯，然後佢就捉住我哋嚟噴，當我哋據理力爭之後，佢就話「嗯，咁冇嘢啦，唔緊要㗎，你哋出返去啦。」但佢完全冇諗過要講句唔好意思㗎喎。當我哋做得好，幫公司搵到新客賺到錢佢又唔會成Team讚架喎。所以個個同事都好大壓力，我哋成Team同事已經諗住轉去第二間公司，其實冇呢位上司我哋都唔會咁齊心。
如果你是這位上司，你會如何處理同類事件？
首先點都唔會連坐法，長期有彈冇讚，唔走嗰個先傻。
化名：老闆你睇到嗎
行業：批發及零售
職位：基層職員
性別：男性
年齡：35 – 44歲
我個上司非常陰險狡猾。佢係一啲做咗好耐嘅老屎忽。能力不足，但係要求多多。自己有時指揮錯誤，搞到大家做錯嘢，老闆一問責，就卸晒落我哋度。佢把口好勁，喺老闆面前話我哋四五句又懶係幫我哋咁講返一句好嘅，例如「雖然佢哋有錯，但佢哋仲細，畀個機會佢哋學習吓」，救命⋯⋯所以我哋作為下屬，有啲咁嘅上司可以話成世都唔會有機會升職，老闆對我哋印象極差。我上司就係咁多年都用着卸膊同擦鞋呢兩招縱橫天下！
如果你是這位上司，你會如何處理同類事件？
如果急件就一早交畀下屬，唔好要班下屬OT幫我做，人哋都要有自己嘅私人時間。
看過幾位讀者的分享，你現在的心情是怎樣？慶幸自己有一位好上司？還是感同身受？假若你是某人的上司，希望你好好閱讀我們以下的分享，好讓澳門街的「恐龍上司」絕種！
打工仔最討厭的10種恐龍上司表現
結語
雖然有些上司真是惡過哥斯拉，比任何人都難頂，但適當的凶悍卻有助工作發展，正如一個太溫和的上司都未必是一位好導師。觀點與角度，在於溝通與理解。清楚每個行為的背後原因，並及時給予適當的建議，才是一位好上司該做的事。
返回 