搵工難？用12項興趣冧老細

見工時，你會填啲咩「興趣」呢？

其實興趣一欄相當重要，冧唔冧得掂老細，原來都係睇呢啲；有外國職場網站列出12項同工作好有關連嘅興趣，原來背後隱藏咗，應唔應該請你嘅重要訊息。

1. 瑜伽

代表你善於控制身體同情緒，以適應高壓環境，例如公關工作。識呢樣，請你機會都大啲。

2. 極限運動

代表你敢於跳出框框，突破限制，唔怕冒險，適合做領袖。但如果對方唔想請人返嚟搞事，就可能有負面效果。

3. 拍片

代表你專注、性格細膩，有利於參與任何製作，尤其係同廣播有關工作。因為拍片，需要你捕捉細節，日後你亦善於留意project細節。

4. 跑馬拉松

證明你有耐力，勝任做企業發展工作，另外做sales都需要呢種持久力。香港被譽為OT之都，難怪咁多人跑馬拉松。

5. 足球隊隊長

如果你係隊制運動嘅隊長，代表你有能力領導公司，同其他人競爭。入唔入到波都係其次，你識點人team work就得。

6. 寫Blog

如果搵緊marketing或者communications嘅工，有寫Blog一定著數，但前題係，如果應用喺香港，相信至少要有高登仔咁嘅文采。

7. 行山

興趣反映個性，行山都一樣，反映你硬朗，可以面對唔同挑戰，有更高目標；再者，對你投身於相關事業都有幫助。

8. 園藝

如果空缺係同自然環境或者可持續發展嘅工作有關，老細自然想請一個鍾意花草樹木嘅人；如果你熱衷於園藝，一定有著數。冷靜，係你嘅本錢。

9. 玩外圍波

唔係賭外圍波，而係講緊Fantasy football，用點數虛擬「落注」球員表現。玩呢啲，代表你有賭徒特質。好嘅方面，就係個risk-taker。

10. 影相

對你搵一啲同創意或者digital marketing有關嘅工作都好有用，除非做龍友影口靚模，否則不妨畀條link準老細欣賞。

11. 玩樂器

贏在起跑線嘅香港人，總有一兩種樂器會識。以此作為興趣代表你有肯付出時間，極度專注同有紀律。

12. 特別興趣

手作、打功夫等等，呢啲都算係特別興趣，有助你同準老細打開話題，等佢有慾望留你喺公司，慢慢認識你。呢招對有錢老細特別有用，因為佢哋有錢就是任性，可能都想玩呢啲。

之不過，外國專家就唔建議見工時同人講自己鍾意睇書啦，佢解釋，書係要睇，最怕係人哋誤會你只係一個書呆子，特立獨行。

資料來源：businessinsider