《難得糊塗》︱7月29號哈囉好工週刊火熱登場

2019.7.29• 周一

導讀：難得糊塗是一種令人羨慕的技能，我們很多時候都在計算每一步的得失，忽略了一些無辦法預知的結果，而導致計劃永遠趕不上變化。我們自以為比任何人都聰明，儘管我們的計劃十分周詳、接近完美，到最後也可能會徒勞無功，然後才意識到我們浪費了太多時間在無用的努力上，唯有活在當下才是生存之道。在今期《哈囉好工週刊》中，讀者分享了他們為什麼會選擇「難得糊塗」。

如果看到同事違反公司規定，而這件事對你沒有影響，你會舉報嗎？

71% 的人不會

29% 的人會

0

如果對你有影響，你又會舉報嗎？

80% 的人會

20% 的人不會

0

你會怎樣舉報這件事？

67% 的人會匿名寫信

14% 的人會匿名打電話

11% 的人會實名寫信舉報

8% 的人會實名電話舉報

0

受訪打工仔看到同事違規，若在沒有影響他們的情況下，七成以上的打工仔都會選擇裝糊塗扮看不見，比起影響他們的時候足足多了5成。而且八成多的人也會選擇用匿名的方式作舉報，可見不少的澳門打工仔都採取隻眼開隻眼閉的態度。

如果你不舉報，你會加入他們做類似的行為嗎？

49% 的人不會

39% 的不知道，看情況

12% 的人會

0

加入的原因

67%如果不加入，他們會對我不利

21% 沒有人知道，做了也沒事

8% 平時都會做這類行爲

4% 加入後有相應的利益報酬

0

不加入的原因

55% 多一事，不如少一事

26% 沒有興趣，只求安穩打工

11% 做了有失個人原則

8% 怕被連累

0

從受訪打工仔的答案，我們慶幸的是，仍有差不多一半的人會拒絕參與違規事情，選擇參與的人只是因為害怕對自己不利而強迫參加。但我們週刊仍建議大家，就算你們參與，你們的關係也只會在金錢利益上。一旦你們決裂，受害的就只會是你自己。

從受訪結果得知，有不少的澳門打工仔都會對於某件事或情況選擇隻眼開隻眼閉。然而，這樣的出發點也可以是有好有壞，以下我們將會分享讀者的隻眼開隻眼閉事件，大家不妨從這些故事中反思一下自己平常的決定是對或是錯。

0

化名：良心譴責我

行業：營運部門

職位：基層職位

性別：女性

年齡：25 – 34歲

我哋份工係輪班嘅，管理級別基本上都係下午六點就放工。有次個同事個女朋友大病，而佢知道呢個理由同上司請假係冇可能批，而且佢都冇咁多日年假。佢同我哋商量過，唔想因為呢份工而冇咗自己將來嘅另一半，就叫我哋幫佢手打卡同頂一頂佢啲工作，等佢女朋友好返之後一定會報答我哋。雖然全部同事幫佢頂咗成兩個星期，大家都辛苦，但唔知點解大家都好似冇乜怨言，可能大家都覺得老細太苛刻，又或者幫自己當做件善事積吓福掛，反正成件事最後都成功暪到老細，而且都冇任何問題發生。

你覺得這種行爲是在所難免嗎？

係㗎，公司福利少，上司又唔幫我哋嘅話，咪自己搵方法互相幫忙囉。

你認為這種「隻眼開，隻眼閉」的決定是對嗎？

當然啱，同事講得好啱，返工絕對唔係人生嘅重點。怪就怪公司唔好，係好嘅我實幫住公司！

化名：Kutar

行業：設計

職位：基層職員

性別：男性

年齡：25 – 34歲

公司有嚴格聲明過唔可以「秘撈」。但其實好難捉到，有部份公司嘅freelance工作未必有合約，潛在住灰色地帶，可以話做咗都冇人知。公司為咗解決呢個問題，如果背後舉報到同事會有獎勵。咁我做設計嘅，會比其他部門有更多嘅freelance機會。有一次我同事離開座位，畀我見到佢做緊啲唔關公司嘅事，畀我知道佢有「秘撈」。雖然係咁，我冇諗住踢爆佢，當睇唔到算，畢竟我知道佢準備結婚，好多地方需要用錢，為咗自己少少錢，害咗人哋我成世都唔會安樂。佢唔係太過分我諗我點都唔會出聲。

你覺得這種行爲是在所難免嗎？

在所難免啊，佢又冇犯法。係人都會有等錢洗嘅時候㗎啦。

你認為這種「隻眼開，隻眼閉」的決定是對嗎？

啱呀，我都冇後悔過，搞到人哋冇咗份工我個心仲會囉囉攣添。

0

化名：金田一

行業：建築及工程

職位：基層職員

性別：男性

年齡：25 – 34歲

公司有個同事好識偷資源返屋企，杯麵嘢飲嗰啲每個星期都畀佢清晒。其實好多同事背後都懷疑，估緊係邊個同事攞咗。因為其實買嘅數量好多，而且同事都知道大家中午食咩，個個星期都冇晒根本係冇可能。其實我知道個「兇手」係邊個，佢就係清潔姨姨。但我選擇唔同老細同同事講出嚟，因為我明白佢嘅狀況：佢人工好低，而且我記得佢呻過啲仔女大個咗都冇理佢。所以我成日見到佢將啲杯麵順手放埋入一個佢準備好嘅垃圾袋，我都冇出聲，我估佢都係放喺屋企以防晚飯不時之需。我唔敢諗佢冇埋呢份工個狀況有幾慘。

你覺得這種行爲是在所難免嗎？

唔識講，不過公司都冇明文規定話同事唔畀攞杯麵返屋企。我相信每間公司總有呢啲同事。

你認為這種「隻眼開，隻眼閉」的決定是對嗎？

無謂趕盡殺絕啦，我認為都好嘅，呢啲都唔算係啲咩貴重財產。

化名：壓力煲

行業：交通運輸

職位：基層職員

性別：男性

年齡：35 – 44歲

同事A同同事B兩個成日都會喺公司度開火，佢哋好似永遠都有嘈唔完嘅交，當初佢哋開始唔妥對方嗰陣，大家都會走埋去勸下，經過一段時間大家都發現勸佢哋唔掂，就開始有得佢哋啦。咁有次同事B有份急件要趕住交畀老細，見佢嗰幾日都博曬命趕份報告。點知就係佢去廁所嗰陣，同事A扮晒嘢行去佢個位度放文件，我見佢好快手咁改亂入邊啲數字。但係我因為怕變成同事C，好似佢哋咁成日嘈交，搞到壓力爆煲，所以我決定當咩都睇唔到。最後報告啲數字錯晒，同事B畀經理鬧咗一獲，聽聞同事A事後仲要落井下石。呢件事之後，我發覺自己唔可以好自然咁同同事B傾計，因為多咗一份內疚感⋯⋯

你覺得這種行爲是在所難免嗎？

唔係，因為其實唔妥同事係好正常，但做到咁樣已經超出咗正常接受到嘅地步。

你認為這種「隻眼開，隻眼閉」的決定是對嗎？

其實好衰，但為咗自己安全，呢個係最好嘅辦法。

0

化名：守財奴

行業：會議展覽

職位：基層職員

性別：男性

年齡：25 – 34歲

我個同事係個啲好鐘意抽人水嘅人，而且最近仲升咗做主管。某日有個新同事初入職，而且直屬under佢，作為同team同事嘅我，我怕主管怪罪我，我忍住口冇同個新同事講要小心主管。果然，主管成日向新同事借啲意抽水，博懵。明明自己每日都睇到，而且都好睇唔過眼。但無奈自己好怕篤背脊之後，影響前景，甚至工都冇埋，所以選擇當自己睇唔到。

你覺得這種行爲是在所難免嗎？

唔知啊，睇電視就睇得多，真係鹹豬手到咁嘅，真係第一次見，自己又係新人點夠膽亂講嘢。

你認為這種「隻眼開，隻眼閉」的決定是對嗎？

其實一啲都唔啱，而且我都好內疚，好對唔住！但係真係唔可以影響到自己前途，只可以講對唔住⋯⋯希望任何老闆留意到都望吓自己啲員工！

0

化名：秋天犬

行業：批發及零售

職位：基層職員

性別：男性

年齡：35 – 44歲

公司採購部某位職員「真實」人工肯定好高。只要係買某幾種特定類型嘅嘢，佢都會叫同事去邊一間入貨。咁傻嘅都知佢肯定同嗰幾間公司嘅人都有關係，而佢就從中食夾棍！咁呢啲嘢我哋只可以羨慕佢人面廣。但係佢而家真係越嚟越離譜，佢中間食提成都算啦，而家入到呢啲貨仲要參差不齊，完全係倒公司米。但係我同另外一位同事都冇諗住出聲：第一我哋覺得佢係典型世界仔，感覺佢同經理都幾熟，等陣原來佢哋係一夥就賴嘢；第二如果佢真係畀人炒咗，我哋工作量都會大增，因為好多用緊嘅公司都係嗰位同事嘅「朋友」。當唔知算數！

你覺得這種行爲是在所難免嗎？

係呀，澳門咁細，總有一啲人係某一間公司做你係識嘅！大家互為互利囉！

你認為這種「隻眼開，隻眼閉」的決定是對嗎？

對公司嚟講其實點都係唔好嘅，啲貨咁嘅樣，點都影響公司嘅名譽。但係自己飯碗重要，冇計啦。

聰明打工仔必須懂得「難得糊塗」

清朝名士鄭板橋「難得糊塗」，教會我們現今打工仔「糊塗」做事。所謂糊塗，不是腦袋進水，而是表面糊塗、內心清明的大智若愚。若想在職場把「聰明」和「糊塗」把握妥當，看看我們以下的分享。

為別人「糊塗」

替上司「糊塗」

在適當的時候用「糊塗」替上司解決問題。如有客戶闖進辦公室並説「叫你老闆出嚟！」，你應該先考慮情況，若自己能解決，嘗試回答「非常抱歉，經理和負責人今天都不在，請問有什麼我能夠幫助你的？」，幫上司處理非必要的困難。

為同事「糊塗」

假如上司要你匯報同事的情況，對於非原則性的問題，例如某同事遲到，某同事上班時間偷睡了，你可以選擇「糊塗」回答，幫同事找個藉口糊弄過去。這也是在職場裡想要如魚得水而採取的一種迂迴的處世之道。

怎樣為自己裝傻

韜光養晦，謹防小人

不要過分顯露自己的才華。適當地保護自己，又能充分發揮自己的才華才是首選職場生存之道。「花要半開，酒要半醉」，鮮花盛放的時候，不是給別人摘去，也會是衰敗的開始。

吞下委屈，化為動力

職場上一定有不辨是非的時候，作為打工仔，工作中受點委屈是很正常的事。這時候，與其在一旁怨天尤人，不如將委屈化為動力，因為有很多事都比委屈更為重要，例如你的職場生涯和發展。

結語

   只要我們活在當下，難得糊塗並非不可能。我們希望上述的分享能使你們更懂得去面對生活的大小事，用正確的工作態度來給自己帶來樂趣，而不要給自己過大的壓力。只要我們已經盡了最大努力，其他事就順應自然吧！

0

查閱更多《哈囉好工週刊》內容：http://weekly.hello-jobs.com/