新聞內容 
《我有嘢要講！》老闆反駁記︱1月28號哈囉好工週刊火熱登場
- 2019-01-28
- https://mp.weixin.qq.com/s/6kJPRFGcanX1TK9p4cC50A
我有一個下屬（以下簡稱A），佢其實做嘢能力係唔錯、效率都好，但就係超級唔識做人，同人相處仲差過啲啱啱畢業嘅。就之前準備升職時期，我決定咗升年資較低嗰位同事，咁A好唔開心咁行入房搵我，問點解佢做嘢咁快咁好都唔升佢，我同佢解釋話佢處事未成熟，佢一聽完呢句就走咗出房。其實我係想佢知道，升職除咗本身辦事能力，更重要嘅一點係管理能力。點知A轉頭就周圍話升職嗰位同事係親生女，我都無言以對……
你覺得員工如何看待這件事？
佢思想上非常唔成熟，唔識從大方向去睇，覺得我一定係衰人。
如果時光倒流，你會有不同的做法嗎？為什麼？
唔會，升一個有管理能力嘅人當然比較好，可能會改變嘅嘢就係同A講得再明白啲。
化名：死牛一邊頸
行業：交通運輸
性別：男性
年齡：25 – 34歲
我自己係一個講嘢比較直接嘅上司，但係我嘅出發點只係為大局着想，或者係想令下屬進步。有一次個fresh grad下屬做錯嘢，因為怕佢唔明白，同埋想佢進步，我就列好晒佢錯咗啲乜嘢，諗一個case應該要顧慮啲乜嘢，整好咗一個檔案send畀佢。點知佢過咗一陣喊住咁遞辭職信畀我，全公司都睇到晒。自此之後我喺公司形象差晒，所有人都覺得我好衰。新入嚟嘅小妹妹都夾硬鬧走，但其實我只係打咗解決方法，一句都冇鬧過佢⋯⋯
你覺得員工如何看待這件事？
佢應該覺得我認為佢太差，冇得救先教好晒佢點做，喊住同其他同事講我鬧佢。
如果時光倒流，你會有不同的做法嗎？為什麼？
唔會，我係真心想畀佢學到嘢，只會希望佢有朝一日會明白。
化名：孖勁人
行業：交通運輸
性別：男性
年齡：25 – 34歲
我喺職場都打滾咗咁多年，平時我都會好畀心機咁教我啲下屬。咁有次我見有位同事搞到大家嘅進度拖慢咗，條Team成日都OT，我就叫佢入房教清楚佢應該要點樣做。但係嗰位下屬竟然質疑我點解要按我嘅講法做，佢會覺得結果一樣就得。但其實我原意係希望大家效率高啲，咁就唔洗OT咁多。我只為大局著想，但無奈下屬好似覺得我咁做管太多。
你覺得員工如何看待這件事？
佢哋有自己嘅方法，認為唔需要跟足上司嘅方法，最後做到就可以。
如果時光倒流，你會有不同的做法嗎？為什麼？
唔會，因為都係希望大家可以準時收工，呢啲都係打工仔希望嘅，人哋唔領情唔代表我唔會再教。
化名：X教授
行業：銀行和金融
性別：男性
年齡：35 – 44歲
公司有新產品要出，咁公司同事工作內容自然會有所改動/增加。一間公司永遠都唔會用同一套制度長期運作。時代會變遷，競爭公司不斷創新，做嘅嘢點可以一成不變？但係我有兩個下屬就唔明，或者佢哋因為喺呢間公司做咗好耐，之前一直都係用舊標準。而家公司改革，行新標準佢哋就完全接受唔到。每日喺公司唔係多多怨言，就係專登拖慢啲嘢嚟做，我明白制度改變開頭係會好辛苦，但係其實改變咗之後大家做嘢係會舒服咗快咗，可惜佢哋永遠唔明。
你覺得員工如何看待這件事？
佢哋會覺得冇嘢搵嘢嚟搞，無啦啦加重佢哋工作量。
如果時光倒流，你會有不同的做法嗎？為什麼？
唔會，我會為整體着想。
化名：準備變屈原
行業：建築及工程
性別：女性
年齡：35 – 44歲
大老闆喺聖誕節前夕諗到一個plan叫我準備，要準備嘅功夫好多。咁我明白聖誕前夕員工都冇乜心機做嘢，所以我自己用咗成晚時間通頂，諗咗一個好完善嘅方案，令每一位同事都唔需要用好多日就可以做完。點知之後竟然畀我聽到，佢哋話我專登整一個project折磨佢哋，喺背後一直鬧我。嗰一刻真係有啲心淡。我冇諗過有人會明白我嘅好意，但係去到畀人鬧真係⋯⋯
你覺得員工如何看待這件事？
員工只會為自己工作量出發，一件方案出咗就一定要做，佢哋冇諗過上司其實已經盡咗力幫佢哋考量。
如果時光倒流，你會有不同的做法嗎？為什麼？
唔會，諗一個有效率嘅方法畀大家，對大家對公司都好。
化名：六畜無害
行業：交通運輸
性別：男性
年齡：25 – 34歲
0
我之前個助理成日做錯嘢。有一次我睇完份文件發現做錯咗好多嘢，我就同佢講希望你檢查好啲嘢先攞入嚟，交一份錯嘅嘢我又要浪費時間去幫佢改正，希望下一次細心啲，唔好再犯。過咗一陣佢就拎返份一模一樣嘅入嚟，質疑點解咁樣有問題。最後我就用咗一個鐘頭時間同佢解釋。其實有時講咁多變咗冇意義，同佢講咗有問題，係希望佢自己去發掘。如果每一次都要咁教佢，佢一世都唔會有進步，但佢偏偏唔明白，話我完全冇教佢。
你覺得員工如何看待這件事？
佢覺得我好似唔理佢然後搵位鬧佢咁，因為佢完全唔知我背後為佢嘅苦心。
如果時光倒流，你會有不同的做法嗎？為什麼？
唔會，持續咁樣其實係害緊佢。
化名：櫻木
行業：資訊科技
性別：男性
年齡：35 – 44歲
我有個下屬做啲設計好慢好差，但因為佢係大老細啲朋友，唔忙嘅時候都忍佢。所以其實就算我係佢上司，我都背後默默咁幫佢做咗好多其實應該係佢要做嘅嘢。點知有一次有大project，按照佢平時嘅速度，佢完全跟唔到Timeline，但佢竟然去同大老細投訴我，嗰吓真係好無奈。佢其實完全唔知自己淨係負責成個project嘅十分之一，我怕佢做唔晒，之後仲要另外幫佢改返，已經好體諒咁幫佢食咗一大part。
你覺得員工如何看待這件事？
佢睇唔到背後嘅真相，每次畀嘢佢做佢就會怪我。
如果時光倒流，你會有不同的做法嗎？為什麼？
唔會，一個同事唔明你點講都係唔明。
化名：阿杏
行業：廣告 / 傳媒
性別：男性
年齡：35 – 44歲
之前嚟咗個好怕醜嘅員工，佢唔多同其他店員交流，我就同佢講畀啲信心自己，唔可以成日都咁畏縮，希望佢自信啲。點知轉頭行到出房見到啲同事喺度安慰緊佢，佢話我畀太大壓力佢，仲鬧佢，鬧到佢唔開心，然後佢就辭職唔做。最慘係HR問佢離職原因，佢居然話因為我人身攻擊，受唔住我嘅壓力而辭職。
你覺得員工如何看待這件事？
可能佢曾經經歷過啲嘢我唔知嘅，或者佢覺得同人交流好大壓力。
如果時光倒流，你會有不同的做法嗎？為什麼？
唔會，由頭到尾都唔知做錯左啲乜。
化名：黑人問號
行業：批發及零售
性別：男性
年齡：25 – 34歲
由於今年市道差，但我又唔想減薪同炒人，咁唯有諗吓其他辦法開源節流啦。咁平時都會買零食畀佢哋休息嗰陣食嘅，而家轉做一啲冇咁貴嘅零食，消耗品改用次一等嘅。但有一日我竟然聽到佢哋講我最近好小氣，啲零食買呢啲不如唔好買，咁我原意都係想唔炒人嘅情況下節流啫…
你覺得員工如何看待這件事？
可能覺得我好小氣，幫我賺咁多都咁慳錢，拎次一等嘅嘢嚟敷衍佢哋。
如果時光倒流，你會有不同的做法嗎？為什麼？
唔會，因為都係唔想炒人，因為個個都同我一齊博命嘅。
化名：呀C
行業：地產
性別：男性
年齡：25 – 34歲
0
我之前帶個新人A，可能因為合眼緣，所以教咗佢好多嘢。咁我知道同事B平時蠱蠱惑惑，就叫A唔好同B講咁多嘢，原因就冇講，等佢自己明白。但後來A唔知咩情況下同B熟咗，仲覺得佢好好人，以為係我想挑撥離間、搞小圈子，無視我嘅建議，咁我就算啦。後來有一次佢哋兩個做錯嘢，B放工偷偷哋向我篤咗A背脊，諗住畀A食晒隻死貓。見到咁嘅情況我只能默默嘆氣。
你覺得員工如何看待這件事？
佢應該由頭到尾都以為我係衰人，搞小動作，做錯嘢又會話佢。
如果時光倒流，你會有不同的做法嗎？為什麼？
唔會，教導新人係自己必須做嘅事。
化名：檸檬茶
行業：旅遊服務
性別：男性
年齡：35 – 44歲
老闆和員工各自在想什麼？
老闆所想的⋯⋯
●「應該做嘅嘢，唔可以因為人情就心軟。」
●「不惜一切，目標至上！」
●「應該將工作當成你嘅興趣。」
●「做好晒手頭上嘅嘢先好去諗請假。」
●「能力係要自己學習，唔係咩都公司教到你。」
●「改變固然痛苦，但之後一勞永逸！」
●「同樣嘅錯誤唔好犯第二次。」
●「好多嘢其實可以喺細節中睇到，多多留意。」
●「有危就有機！」
●「開始穩定啦，可以諗下點改善。」
員工所想的⋯⋯
●「得罪人？咪搞！以後邊個同我食中午？」
●「做唔到咪算，反正賺到我又冇得益。」
●「我工作只為錢。」
●「休息係我權利，做唔晒聽日再講。」
●「公司應該慢慢栽培我成為人才。」
●「麻鬼煩，照舊咪得囉！冇嘢搵嘢嚟做！」
●「多做多錯，唔做唔錯！」
●「差唔多咪得囉！」
●「其實你係咪好得閒？」
●「做得晒先算，啲嘢根本做唔完。」
結語
一件事對與錯，可能只是觀點與角度的問題。相信每個人做每件事都是有原因的，所以在批評別人前，可以先設身處地站在別人的角度去思考。希望各位打工仔能夠更加了解你老闆的想法，在職場上如魚得水。
返回 