新聞內容 
《患難見真情》知音難覓︱10月29號哈囉好工週刊火熱登場
- 2018-10-30
- https://mp.weixin.qq.com/s/DPK1-HrGjSBqdFferOX2Cg
患難見真情_知音難覓
導讀：生命，看似是個獨立的個體；但生存，卻是互相交錯、相互影響的。沒有人能獨自生活，在職場上亦然如此。建立職場友誼能使工作變得更加有趣和有意義，職場上有一戰友，甚至能和你並肩作戰、陪你走過高山低谷，實在無憾。今期《哈囉好工週刊》會和大家分享讀者的投稿—在競爭激烈的職場上「患難見真情」。
患難見真情
你相信在職場上有真正的友誼嗎?
82% 的人相信有真正的友誼
18% 的人不相信有真正的友誼
你在職場上有100%信賴的朋友嗎？
68% 的人有100%信賴的朋友
32% 的人沒有100%信賴的朋友
那些你深信的職場朋友是從哪裏認識的？
30% 的人從同期入職公司/部門認識
27% 的人從同一部門的同事認識
18% 的人從大學認識
10% 的人從中學認識
6% 的人從學院認識
5% 的人從親戚認識
4% 的人從其他部門的同事認識
你與這些朋友見面的次數是？
65% 每天
27% 每週2-3次
5% 每2週一次
2% 每月一次
1% 很難見面
你有受這些朋友的幫助過嗎?
96% 的人有受過這些朋友幫助過
4% 的人沒有受過這些朋友幫助過
大部份打工仔對職場友誼都有相當的憧憬，他們所信賴的朋友，超過一半都是由同事關係開始認識。職場競爭激烈，每個人都希望在這場戰爭中脫穎而出，但在這個情況下打工仔仍願意相信有真正的職場友誼，可見這份友誼對於打工仔來說佔據着相當重要的地位。以下我們將會分享打工仔分享一些「患難見真情」的感人故事。
HELEN
性別：女性
行業：會議展覽
年齡：25-34歲
職位：基層職員
有一次公司有份報告要出，但係去到最後一日嘅中午，我部電腦中咗毒，甚至叫埋IT都搞唔掂。嗰一刻完全係絕望到想喊。其他同事聽到呢個消息，竟然全部過嚟幫手，甚至連其他部門都有份，最後大家夾手夾腳做通宵，啱啱好講得切，大家再一齊去飲早茶，呢段回憶我諗我一世都記得。
從上述的經驗裡學習到：
互助互愛，有時有啲嘢真係一個人做唔完，互相幫助效率點都高啲
琪琪
性別：女性
年齡：25-34歲
行業：地產
職位：基層職員
平時主管對我好惡，雖然全部都話得啱，但其實唔好聽嘅說話冇乜人鍾意聽，所以大家嘅關係都唔係好。有一次我犯錯，經理叫咗主管入房一直鬧。直到過咗幾日喺走廊撞到經理，經理同我講話我有一個好主管。經理明知係我錯，但就見到主管一直袒護，仲話我平時好好。到咗嗰一刻，我先開始明白到做上司有幾辛苦，同埋知道我上司有幾好。
從上述的經驗裡學習到：
忠言逆耳。人大咗，要嘗試接受身邊嘅嘢，得益嘅其實係自己。
KATHY
性別：女性
行業：酒店營運
年齡：25-34歲
職位：基層職員
啱啱畢業搵到份工，份工嘅職責就係等主任安排工作。我哋主任喺度做咗好多年，跟住考到政府工準備走，所以佢工作特別唔上心。佢仲要當我係有經驗，我上一個都係頂唔順佢先走。做咗呢份工一陣已經搞到自己成日病，從來都未試過咁辛苦。喺佢last day嘅前一日，佢要我出晒300張發票，更新埋系統嘅價錢，分類入好信封，第二朝就要送晒出去。點知佢條友自己竟然準時放工，我就留喺公司print發票，print完已經九點幾，仲要開始分類入信封，好彩有個同期入職嘅秘書姐姐幫我加班 ( 加班係冇得計錢或者補鐘 )，真係好感動！
從上述的經驗裡學習到：
職場上絕對係多朋友好過多敵人。
HELEN
性別：女性
年齡：18-24歲
職位：基層職員
行業：行政/辦公室助理
我做緊嘅部門係幫大老細做嘢，平時大約就係要幫佢手處理好啲文書嘅嘢。有一期唔知係咪自己工作壓力太大，成日做錯嘢。有一次我唔小心將佢成疊要簽名嘅文件整錯咗月份，大老細仲要差唔多簽晒先發覺。佢喺房間大叫係邊個做嗰陣，我嗰一刻真係好驚，另外兩位同事應該知道咩事之後竟然陪我一齊入房，分擔罪名。之後仲氹番我開心話同事之間應該要齊上齊落。
從上述的經驗裡學習到：
做錯事可能會畀人鬧得好勁，但要勇於承認錯誤同自我檢討。同事嘅幫忙，無論多或少，佢哋嗰份真心想幫你嘅感覺真係好有愛。
祖兒
性別：男性
行業：行政/辦公室助理
年齡：25-34歲
職位：基層職員
自己本身係一個好唔小心嘅人，入咗公司冇幾耐，已經畀上司話過好多次。有次幫高層佢哋搞聚餐，我唔記得咗有位高層對海鮮敏感，幫佢哋點咗個海鮮大餐。完事之後嗰位高層黑晒口面，走去上司度問發生咩事，可能我上司知道今次好大件事，唔救我應該會畀人炒，所以佢幫我頂咗呢隻鑊，上司畀高層鬧完仲要搞到申請緊嘅假期遲遲都未有答覆。
從上述的經驗裡學習到：
有好同事係好彩，但千祈唔好太過依賴，打工始終都係靠自己。
陳小姐
性別：女性
行業：專業人員
年齡：35-44歲
職位：中層管理者
我同我啲下屬嘅關係，唔可以話好好。自己係啲要求好高嘅人，佢哋同我做嘢可能都會好辛苦。但係有一次我病咗，病得幾犀利，有個下屬應該知我緊張自己啲報告，主動幫我將需要嘅文件送晒去我屋企，來來回回走咗幾轉，仲買埋粥比我。公司喺澳門屋企喺路環，嗰日仲要有啲雨，所以呢件事對我嚟講非常深刻。
從上述的經驗裡學習到：
原來下屬一直都好支持自己，只係平時自己留意唔到。要多啲關心自己啲下屬。
JOYCE
性別：女性
行業：娛樂博彩
年齡：25-34歲
職位：基層職員
上一次天鴿之後，大家都人心惶惶，冇水冇電。雖然唔使返工，但係屋企有老人家，而且冇點準備食物，所以颱風完咗馬上落去搵嘢食畀屋企長者。返到屋企之後發現嫲嫲瞓咗喺地，佢喺去廁所中途唔小心跌親，整親條腰骨要去睇醫生。當時我好無助，自己冇乜朋友唔知可以搵邊個，只好搵同事求救。我同事竟然帶埋佢兩個細佬過嚟幫手抱我嫲嫲落去，我屋企仲要住係二十幾樓，我嗰陣感動到喊左出嚟。
從上述的經驗裡學習到：
好同事唔係必然，所以平時對人好啲，有咩事嘅話大家都會願意幫你。
NANA
性別：女性
行業：廣告/傳媒
年齡：25-34歲
職位：基層職員
以前公司董事長好孤寒，樣樣都計到盡，攞枝筆都要用電郵申請嗰種。有次公司要搞event，經理因為知道董事長心意，申請價錢嗰陣都計到盡晒。最後我哋做完出嚟比佢預算超支咗成千蚊，其實問心係我自己累到要超支。經理知道咗之後，直接放低咗一千蚊係枱面就返入房，嗰一刻我覺得佢係神。
從上述的經驗裡學習到：
如果所有同事都可以做到互助互愛，間公司嘅士氣同效率都會高好多。
愛德華
性別：男性
行業：餐飲
年齡：25-34歲
職位：基層職員
我哋鋪頭推出咗新菜式，點知反應比預期好太多，完全唔夠材料整畀客人。就喺我好擔心不停咁問啲供應商可唔可以即刻送貨嗰陣，有兩個同事自己放緊假都走出去同我買啲材料返嚟。
從上述的經驗裡學習到：
生意固然重要，但處理好員工關係亦同樣重要。就好似今次咁，冇咗呢班員工都唔知點算。
JUSTIN
性別：男性
年齡：25-34歲
行業：資訊科技
職位：基層職員
我個同事有次犯咗一個好嚴重嘅錯誤，令到公司損失慘重。但其實呢位同事平時做嘢唔錯，而且對人好好，其他同事如果有困難，喺佢能力範圍內嘅佢都會幫。所以今次發生左呢件事，老細未開口，已經有好多同事同佢求情，好彩最後老闆網開一面，只係畀警告信，唔係同事同心協力佢真係會畀人炒魷魚。
從上述的經驗裡學習到：
如果平時自己真誠待人，大家都會明白嘅。
95%的打工仔認為在職場上有真正的友誼是很重要的，因為：
57% 我可以獲得更多的職場建議和支持。工作中的情緒可以找職場上的朋友交談以尋求幫助和支持。
22% 職場的人際關係非常重要，因為其他人的幫助可以讓工作更順利。
17% 職場友誼讓工作及環境變得更有趣。
4% 從職場上我需要找到一個生活伴侶，一定由職場的友誼開始。
5% 的打工仔認為在職場上有真正的友誼是不重要的，因為：
59% 當有利益衝突時，每個人都會只會關心自己，所以職場上的友誼並不真實。
23% 工作就是工作，同事間友誼會影響工作的專業性。
9% 公司是工作的地方，我工作不是為了參加人氣比賽。
9% 我的工作很忙，還有家人需要照顧，沒有時間建立友誼。
總括而言，你希望在職場上有值得信任的朋友嗎?
77% 希望職場上有值得信任的朋友
23% 不希望職場上有值得信任的朋友
結語
真誠待人才會擁有「真友誼」。但請記得，無論在職場上關係有多友好，最後大家都會各散東西，各奔前程。因此，不要輕易被職場友誼影響自身職涯發展，與此同時，我們亦應和同事彼此相助，亦成為別人可靠的戰友。
返回 