新聞內容

《子不教父之過 女不孝母之錯》家教根本就係父母教︱5月13號哈囉好工週刊火熱登場

  • 2019-05-14
  • https://mp.weixin.qq.com/s/NECa9gEgFmQK8pCdOeLDFg

2019.5.13 • 周一

導讀:每一年的母親節,我們都希望和大家一起對在職媽媽的貢獻和努力表達感激之心。但今期《哈囉好工週刊》,我們希望為大家表達父母對於小孩的影響力。其實身邊同事的各種行為,往往透露了同事是否有被他們的家人教育好。一個在父母良好教育下成長的小孩,他們會懂得體諒照顧身邊同事;相反,沒有被教育好的,他們只會為自己爭取最大福利,不理同事感受,認為全世界都欠了他們似的。希望大家看看以下故事,避免成為沒教養的同事。

化名:咳到肺都甩

行業:資訊科技

職位:專業人士

性別:男性

年齡:25 – 34歲

之前天氣忽冷忽熱,搞到公司啲同事都病病哋,又咳又唔舒服。咁公司係有提供免費口罩嘅,但有個同事佢明明咳到肺癆咁都唔帶口罩,佢咳都唔緊要,仲要對住人咳又唔掩口。佢話帶住口罩好焗好唔舒服,搞到我哋成班冇病嘅同事都驚咗佢,個個都戴口罩防住佢,搞到有病嗰個唔戴口罩,冇病嗰啲就相反要戴口罩,驚畀佢傳染。佢最經典嗰兩樣嘢就係:打乞嗤打到成個電腦螢幕都係佢啲「雨水跡」,同埋佢枱面一座一座嘅「雲吞」山。真係痴線,明明隻腳隔離就有一大個垃圾桶都唔肯掉入去。

你覺得怎樣才是適當的行爲?

其實真係好唔舒服就請假啦,唔好返嚟傳播病毒。就算你真係請唔到假,就帶返個口罩啦,連最基本嘅衞生都唔識。

0

化名:大哥大

行業:批發及零售

職位:基層職員

性別:男性

年齡:25 – 34歲

有次返工落好大雨,一直到我哋收舖都唔停,好彩平時有放遮喺公司。臨走嗰陣,我見到我同更嘅同事佢冇帶遮,就行去關心吓佢,諗住佢目的地近嘅話就遮埋佢。點知佢自信滿滿咁話我蠢,佢話佢直接喺傘架攞咪得囉。我費事同佢有正面衝突,同佢講咗句拜拜就走啦。返到屋企,就見到公司同事個群組有好多訊息,原來我個同更同事攞走嗰把遮係一個唔舒服嘅同事準備放工去睇醫生用嘅,佢喺群入邊問,但同更同事冇應到。第二日,佢攞返把公司遮返嚟,隨手就放喺舖門口,完全冇一種內疚嘅感覺,我示意叫佢同同事認錯,佢居然話:咪玩啦,都唔知嗰把遮有冇細菌,行去叫佢畀返個身體檢查費我就差唔多。

你覺得怎樣才是適當的行爲?

咁大個人,自己嘅過失要人哋埋單,非常冇家教。管理好自己內在,先好諗任何升職嘅嘢!

化名:小飛飛

行業:餐飲

職位:基層職員

性別:女性

年齡:35 – 44歲

咁我哋餐廳都會包餐嘅,基本就要睇廚師煮咩我哋就食咩啦。廚師多數都係煮三餸一湯嘅,然後一圍人坐埋喺度食啦。但有個員工佢真係好冇家教,成日用隻公羹直接飲湯,從來都唔會潷湯落自己個碗度。咁樣未算最過分。佢飲紫菜湯嘅畫面真係永遠都記得:佢飲完湯隻羹仲有好多紫菜痴咗喺度,佢喺我哋咁多人面前用佢棚牙直接挖啲紫菜嚟食,食完仲要舔隻湯羹幾吓……而家紫菜湯已經係變咗佢背後嘅化名。如果可以嘅話我甚至連呢款湯都唔想再飲。

你覺得怎樣才是適當的行爲?

其實公羹個「公」字係人都識解吧。如果唔小心一兩次都冇所謂,佢仲要咁深情喺度舔,真係……大家只係同事關係,衛生啲好。

0

化名:暗瘡豬

行業:酒店營運

職位:中層管理者

性別:女性

年齡:25 – 34歲

公司有個新嚟嘅Admin,我諗佢應該係啱啱畢業。見高拜見低踩,見到高職位嘅同事就非常恭敬,見到啲低職位,例如清潔姨姨,講嘢就粗聲粗氣,呼呼喝喝。阿姨做嘢慢少少,就不斷催催催,相信其他同事見到都同我一樣睇唔過眼。有一次真係好過份,自己應該要做嘅嘢,因為夠鐘唔想加班就叫公司司機幫手,司機唔小心誤會咗佢意思。最後老闆鬧佢,佢放工仲去鬧司機。能力不足,要求多多,簡直係極品!其實講得唔好聽,我覺得佢先係公司最卑微嗰位,人格絕對係公司入邊最差嗰位!

你覺得怎樣才是適當的行爲?

同事嘅基本互相尊重一定要有。希望佢有一日知道自己嘅行為係幾咁討厭。

0

化名:巨人

行業:會議展覽

職位:中層管理者

性別:男性

年齡:35 – 44歲

我隔嚟位個同事好鐘意打斷人哋講嘢,成日吹水又唔抹嘴!有次我哋圍埋一齊開會,各個TEAM嘅同事講緊大家各自嘅工作。但無論到邊個TEAM佢都係咁插嘴,有建設性嘅都OK,但問題係一堆廢話,有時仲講啲無聊嘅玩笑,插嘴插到另外個同事最尾都唔想講,完全變成佢嘅「個人Show」。但其實冇人想聽佢講嘢,大家都有佢自我感覺良好繼續講。雖然炒熱氣氛好似係唔錯嘅表現,但而家喺傾公事,過度插嘴係好唔尊重同事。其實我感覺佢好似持住自己屋企有錢同埋識好多人先咁多嘢講,其實大家都只係覺得佢係一個冇能力冇家教嘅世界仔⋯⋯

你覺得怎樣才是適當的行爲?

人哋講嘢講到一半插人嘴其實係好冇禮貌,希望佢學識等人哋講完先發表自己意見。

0

化名:Phantom

行業:廣告/傳媒

職位:基層職員

性別:男性

年齡:25 – 34歲

我哋公司老闆定期都會請大家食西餅或者蛋糕嘅。有個同事好鐘意咩都試一小啖,然後搞到啲西餅每一件都少一忽。然後佢就會講佢句金句:「我食唔到啦,好飽啦,你幫我食埋佢」;分蛋糕嗰時見啱自己鐘意食嘅口味,又係分自己最大份先,然後先分畀其他同事。其實個個對於佢咁嘅行為都好無奈,大佬,而家仲細啊?小朋友?定屋企冇飽飯食?有時食大啖啲都好少少,最慘係佢以為細細啖就冇人知佢食過。迫大家食佢口水尾。我真心希望佢冇病,食咗佢口水尾嘅同事冇畀佢傳染佢啲「港女癌」。

你覺得怎樣才是適當的行爲?

做人唔好咁自私,咁樣做真係好冇禮貌,感覺冇咩教養。尊重同事其實都係尊重自己嘅一種。

 

化名:Bob頭黨

行業:酒店營運

職位:基層職員

性別:男性

年齡:18 – 24歲

之前返工嗰度有個同事好鐘意偷睇人哋WeChat,人哋電話彈咩訊息出嚟都會睇,偷睇完又話返畀啲同事知。其實冇人想將自己啲隱私畀人知架囉!仲有佢係唔會認係佢睇。佢會講啲藉口例如話見攰,咁啱經過你後邊伸吓懶腰睇到。但其實你係好清楚睇到佢係咁偷睇自己部電腦,咁樣真係好冇家教囉!後來反映咗畀HR知道,HR後來畀咗warning letter佢。但佢竟然唔知道自己錯咩,仲到處講HR衰。

你覺得怎樣才是適當的行爲?

職場需要專重別人隱私,其實大家只係同事關係,我諗你都唔想人哋以其人之道還治其人之身㗎麻。除非你永遠都冇人搵嘅啫⋯⋯

0

化名:其實我哋唔熟

行業:保險/金融業

職位:中層管理者

性別:女性

年齡:25 – 34歲

有一次出去約咗客喺公司外面lunch meeting,而間餐廳中午好爆,一般都要等位,好在我叫我助理幫我book咗先有位。傾緊嗰陣咁啱見到公司一齊做嘢嘅同事,我諗緊佢係咪唔知我見緊客,直接走過嚟同我講話搭檯。佢話同佢男朋友咁啱過嚟食lunch,好想食呢間。我已經打晒眼色,而且暗示我見緊客唔方便。但佢好似當冇嘢一樣,照樣坐低。個客當然咩都冇講,亦都唔好意思講。成個lunch我同個客咩公事都冇傾到,聽住佢同佢男友談情說愛。可能佢屋企冇人教佢,反正佢好唔識做人。

你覺得怎樣才是適當的行爲?

見到同事見緊客就醒目啲啦,唔好去打擾。而且點都要識啲人情世故,唔好咁自私,覺得其他人都要為佢而轉。

 

化名:This is SPARTA!

行業:地產

職位:基層職員

性別:男性

年齡:25 – 34歲

公司有個女同事好冇禮貌,平時同佢打招呼佢都唔會應嘅。你明明同佢有眼神接觸佢都唔會同你講早晨,或者Bye Bye。咁都算數啦,反正我盡我自己應有嘅禮貌。咁有一日朝早我搬緊嘢,成手都係嘢啦喎,佢見到都冇幫手,我都算數啦,咁我哋公司係推門嚟嘅,佢見到我成手嘢正常都幫我頂一頂門吧,但佢仲要推一推返度門等對門關快啲,仲搞到我夾親。佢連一句對唔住都冇講到,一副冇表情嘅樣就走返入Office,我諗佢應該覺得自己係公主,要搵人幫佢開埋門畀佢行先啱,真係唔明點解佢可以喺呢個社會生存到。嗰一刻真係好想一腳踢落玻璃度撞爆佢個頭!

你覺得怎樣才是適當的行爲?

其實我覺得你唔幫手都唔緊要,但係唔應該咁做嘢囉,同事之間嘅舉手之勞好正常姐啫,唔幫仲要踩你一腳!

 

化名:酒杯敲你個頭

行業:廣告/傳媒

職位:基層職員

性別:女性

年齡:25 – 34歲

老闆新年前請晒一班同事去食飯,有個好熱情嘅同事爭住點餸,而且叫到成檯都係餸,雖然係老闆請,但係我哋同事得小貓三四隻,仲要全部都係女仔,點有可能食得晒?佢幾好嘢,自己鍾意食嗰啲就食一半以上,唔鍾意食嗰啲就蜻蜓點水。老闆一早就話想食邊幾樣餸,淨係叫得一款,自己點晒啲賣相唔錯嘅菜,好多都唔好食,佢叫就為咗不停影相PO朋友圈。最後啲餸食剩咗好多,我就問其他同事,要唔要幫你哋打包?點知嗰個熱情同事好大聲話咁難食仲要叫我哋打包返去食,咁難食係未應該唔洗收我哋錢呢,唔係我哋就上網唱衰你,搞到你哋無晒生意。其實難睇嘅唔係嗰個同事個樣,而係老闆個樣,老闆雖然冇黑面,但係一句聲都冇出,我諗應該得佢唔知間店係老闆嘅客戶開嘅。

你覺得怎樣才是適當的行爲?

首先老闆請食飯,唔好好似自己請咁叫咁多嘢食;第二,老闆都未叫,又唔係你請,畀老闆叫先得唔得?第三,就算難食都唔好浪費食物;最後就係要識睇老闆面色

 

結語

    上述的故事分享雖然強烈反映了家長教育的重要性,但我們希望你明白家教只能在一定程度上影響我們的成長。因為我們一踏進社會,我們有100%的責任去改變自己不適當的行為,而不是怪責自己的父母沒有好好教育,希望大家看完上述故事能好好體會。